一BURN萬里 @MOVE & RAISE 運動慈善挑戰

今次「一BURN萬里」挑戰，我哋一班同事決定玩大啲，組隊參加「好動城市盃體能賽」！雖然賽程唔夠 15 分鐘，但運動量比想像中吃力。

由賽前特訓、研究戰術，到正式落場嗰刻，成個過程都超熱血。最後團隊成績令我哋非常驚喜：企業四人接力隊奪冠，全民女子四人接力隊亦贏得亞軍！見證住大家由辦公室戰友變成賽場隊友，一齊衝過終點嗰份快樂，真係幾多卡路里都換唔到。呢場仗，我哋贏咗獎牌，更贏咗默契！

【一步一腳印：行出無痕山野 🥾⛰️ 】

早前，我哋一班同事由土地灣出發，挑戰香港經典行山徑——龍脊！喺欣賞360度山海美景嘅同時，大家帶齊裝備，沿途清理山徑垃圾，身體力行實踐「無痕山野」嘅理念♻️ 呢種將「行山」同「執垃圾」結合嘅活動，叫做「Plogging」，唔單止可以鍛鍊身體，仲可以為環保出一分力！

當天天氣好熱，特別係前段上山既時候又熱又攰，但係當上到山頂既時候，望住成個大海景同埋綠草如茵既景色，就覺得所有汗水都好值得！同埋有一大班人一齊向住同一個目標，真係好熱血！

Coming soon!

Coming Soon!

Daniel：「作為一個熱愛行路嘅人，趁住復活節假期參加咗今次「一BURN萬里」挑戰 —— 7日行5萬步！中間都有幾日偷懶，行得唔算多， 不過最後都下定決心追返啲步數，順利完成！Pikmin Bloom 係一個步行種花嘅 App，真係會增加大家行路嘅動力，邊行邊種花，其實幾有趣 。」

Nadia：「坦白講，呢三、四年我都有斷斷續續去健身室，但始終建立唔到一個持續嘅習慣。今次三日斜路步行挑戰，係一個好好嘅機會去督促自己。

完成咗三次之後，好似重新搵返恆常運動嘅節奏。呢個挑戰提醒咗我：最重要係肯出現，肯開始。每次行到出汗，成個人都鬆晒，心情都輕咗，好舒服。運動唔係要一下子做到好辛苦，而係要慢慢養成持續嘅習慣。

呢三日俾咗我信心同動力，令我更加記得健康係自己嘅責任。之後我都會繼續保持，唔止挑戰，而係要將運動融入生活。」

Cassandra：「喺今次「一BURN萬里」挑戰入面，我揀咗跑步同Boxing訓練，各挑戰咗3次。對於好多年無恆常運動嘅我嚟講，每次要踏出第一步，都好似要同自己內心打交咁。

跑步對我嚟講，就好似一種磨練 — 記得第一日跑5km嗰陣，跑兩步已經覺得好攰，心裏面掙扎想停低，但因為好想完成呢個團隊挑戰，唔想咁快放棄，所以咬緊牙關堅持落去。到最後一次跑嘅時候，我慢慢感受到跑步帶俾我嘅樂趣，開始嘗試調節呼吸，享受自己嘅速度，同埋喺跑步入面屬於自己嘅空間。

而Boxing對我嚟講，就係一個喘息嘅出口，將日常生活嘅壓力宣泄出嚟。對住沙包，每一拳都要夠快、夠準，加上無間斷嘅體能訓練，挑戰我嘅反應同體能極限。原來每個鐘嘅訓練好快就過，踏出課室嗰刻，完全感受到做運動產生嘅多巴胺，帶住輕鬆啲嘅身體返屋企。

今次兩項挑戰，都令我突破平時懶懶閒嘅生活習慣，亦感謝呢個挑戰俾咗動力我去嘗試新嘢。希望呢個運動習慣可以延續落去，亦希望呢個campaign可以讓更多人知道做運動嘅快樂同好處，一齊推廣運動！

Tracey：「今次係我第一次挑戰「一尖三咀過四灣」嘅行山路線 ，全長26公里，最後用咗十個半鐘順利完成！
當日因為天氣影響令到路況更加難行，但反而令我更加專注行眼前嘅每一步。呢樣都係我鍾意行山嘅原因，可以全程投入當下。 行長途山路，最重要係有同行嘅伴，互相照顧，辛苦嘅時候為對方打氣，最後一齊呼歡住衝去終點。行完身體雖然攰，但得到滿滿幸福感。」

Winnie的日行萬步挑戰

Winnie：「今次步行挑戰唔單止督促我做多咗運動，仲俾我有機會真正去探索自己住緊嘅社區。

雖然喺屯門住咗三年，但發現原來有好多地方一直都只係路過，從未認真停留同了解過。

透過今次步行，我留意到好多有趣嘅小店、適合做運動嘅公園同路徑，仲有唔少喺社區入面享受運動嘅人。令到我開始有興趣同動力，之後想繼續用步行、跑步或者踩單車嘅方式，深入探索成個大西北！」

Vincy：「曾經要被逼先跑步嘅我，過左一排，最近鍾意翻跑步！不過我已經好耐冇跑步啦！今次挑戰自己跑5公里！
雖然係自己落公園跑，但係參與團隊「一BURN萬里」挑戰，就係好似有好多人同我一齊跑緊咁，對我黎講係幾有意義同埋創造左開心嘅回憶～！雖然比以前跑慢左，但都好開心可以今次可以以挑戰形式跑步，之後我都會繼續pick up！」

Molly：「以前成日幫自己搵藉口，一係話攰，一係就話聽日先做運動。但透過呢個團體挑戰活動，令我都成功挑戰自己！ 由最開始每 5 分鐘、10 分鐘係咁望錶，到最後可以爬足 30 分鐘，過程對我呢種少運動嘅人嚟講真係幾難捱。以前

我一定會話『下次先啦』，但原來當運動唔再只係個人嘅事，而係每一滴汗水都可以幫到人嘅時候，個人真係會堅持到落去。呢種『逼』出嚟嘅堅持，真係令我有更多動力繼續做落去！

Shirley：「4月9日休假中的我喺野外步行咗超過一個鐘。中途蕁麻疹發作，搞到要停下行下，真係好辛苦，幾乎想放棄。 但最尾都頂硬上完成到，成個人即刻鬆一口氣。雖然過程唔容易，但見到自己堅持到最後，都幾有滿足感。多謝屋企人嘅鼓勵，今次挑戰令我更體會到，健康真係要主動爭取返嚟。

多謝屋企人嘅鼓勵，今次挑戰令我更體會到，健康真係要主動爭取返嚟。」

YuTing & Alvina:

Background
點解當初會有呢個想挑戰連續滴50下乒乓波嘅念頭？
話說上年中秋節公司 Party 玩遊戲，我嗰隊抽中咗個高難度任務：每人要滴10下乒乓波，然後傳畀下一個隊友接力，對於由細到大都冇運動天份嘅我嚟講，簡直難過登天（當時我親愛嘅同事們仲要All-in賭我哋嗰隊會失敗！！😮‍💨）。

點知失敗咗好幾次之後，奇蹟竟然出現咗！！！我竟然成功連續滴到10下乒乓波，最後仲同隊友喺限時入面完成任務！！🏓

自從嗰日開始，班同事只要見到關於乒乓波嘅嘢都會瘋狂Tag我。既然大家都咁期待，我就決定再挑戰下自己，玩個升級版——「連續滴50下乒乓波挑戰」！今次仲拉埋我 Fundraising 嘅隊友 Alvina 一齊練習兼自我挑戰。雖然到呢一刻我都仲係未乜信心，但係唔試過，又點知唔得呢？！

YT Day 1 練習記錄： 30分鐘戰績戰：11/50球
今日特登搵咗個識打乒乓波嘅「高人」指點吓。原來唔係一嚟就瘋狂「滴滴仔」，首先要練好平衡力同埋對方位嘅掌控。我發現手感同節奏真係超級重要！

第一日練習，我發現咗自己兩個大問題： (1) 太心急，跟唔到個波嘅節奏 (2) 手腳唔係太協調😮‍💨
距離 50 下嘅目標仲有好大段路，老實講係有少少frustrating。但喺練習入面我反而更加了解到自己嘅短處，例如個人好心急，見唔到即時成果就容易忟憎。所以今次挑戰除咗練球技，更加係訓練我嘅耐性、毅力同埋 EQ～希望聽日可以帶住今日嘅手感，見到有進步啦！

距離 50 下嘅目標仲有好大段路，老實講係有少少frustrating。但喺練習入面我反而更加了解到自己嘅短處，例如個人好心急，見唔到即時成果就容易忟憎。所以今次挑戰除咗練球技，更加係訓練我嘅耐性、毅力同埋 EQ～希望聽日可以帶住今日嘅手感，見到有進步啦！

Coming soon!

Coming soon!

Coming soon!

Coming soon!

Coming soon!

Coming soon!